152 objektu kaxa hutsean “anabasa” formakoak.

gorde

Eraiki dezagun gure begiek ikusten dituzten altxorrentzat gordeleku oparo bat, non argia eta ilunaren arteko nahasketak lasaituko gaituen eta itsaso bareak harkaitzak besarkatuko dituen presarik gabe.

gorde

Bizitzarentzat gehigarri luxuzkoak: benetazkoak, dendetan saltzen ez diren horietakoak. Ez gara bakarrik sentituko elkarren ondoan. Ez da osagairik faltako. Horregatik gordeko zaitut instant batez begirada honen hondoan.

2006-09-26 23:01:39 (anabasa)

erauzi

Hitzak erauzi zizkiguten erraietatik, petrolioa itsas hondotik atera nahi balute bezala. Barruarekin ezin da jolastu ordea; are gutxiago indarrez.

erauzi

Behartzearen ondorioak. Petroliorik eza. Sarea bota itsasontzitik eta arrainik ez kostan.
Indartu, bortxatu. Sareak hausten dira. Une batetik aurrera, kolore bat gutxiago itsasoan. Eta guk, ustez sareak josten genekielakoan, hauek hautsi besterik ez ditugu egin.

Sareak harrapatuta, burdinazko kaiola batean lez, gure eremuetatik at erauziak.

2006-09-11 23:34:51 (anabasa)

korronte

Argazkietan gaizki fokatuta ateratzen gara. Mozorrotuta ere batzuetan. Ez da kapritxo hutsa; gauzak hala ateratzen dira. Korronteari jarraitzen diogu, besterik ez. Egunero desertu txiki horretatik ikusten ditugun gauzek bezala. Korronteari jarraitzen diete.

Manifestazioak eguzkipean barra-barra. Elkarretaratze jendetsuak. Dezibelio naturalak paisaiaren oihu gisa. Hondamendi gizatiarrak epaileen begietan.

Eta gu horren parte gara. Bagoaz, eskilaretan gora ala behera batek daki, baina lekuz aldatuko gara ez izan dudarik. Esperientzia berriak gauzatzera, denon artean ikastera. Manifestazio, elkarretaratze, dezibelio eta epaien gainetik.

korronte

2006-09-06 22:44:22 (anabasa)

gezur

Ez esan gezurrik, ez ibili itxurakeriatan. Ez al duzu ikusten azken finean kaka bera dela? Egia gordina ez azaleratzeagatik, guztiok geure baitan dugun hori ozenki ez errepikatzeagatik.
Ez esan gezurrik, ez esan maite nauzula, benetan desiatzen duzuna larrua jo eta plazerraren gose temati horri jaten ematea denean. Galdeiozu bestela, biharko ajeari.

2006-08-05 11:51:39 (anabasa)

alkimista

Benetan irakurterraza eta sakona Paulo Coelhoren Alkimista, bizitza beraren inguruan hausnartzeko balio duen liburu horietako bat. Bertatik esalditxo batzuk ekarri nahi izan ditut hona.

Amets bat gauzatzeko aukerak, horrexek bihurtzen du interesgarri bizitza.

Gizaki guztiak bezalakoxea naiz: gauzak gertatzea gustatuko litzaidakeen modura ikusten dut mundua, eta ez gauzak gertatzen diren moduan.

Horrelakoxeak baitira giza bihotzak: beldurra diote beren amets ederrenak gauzatzeari, ez dituztela merezi uste izaten baitute, edo ez dituztela eskuratuko.

Behin gertatzen dena baliteke gehiagotan ez gertatzea. Baina birritan gertatzen den guztia hirutan ere, zalantzarik gabe, gertatuko da.

2006-07-27 20:39:20 (anabasa)

hil

Egunero hiltzeko bi arrazoi:

  • Egunero jaiotzea
  • Arrazoi bat izatea
hil

2006-07-17 22:31:39 (anabasa)

mundu

Mundua aldatu da. Ez zarete konturatu ala? Ba ez, ni ere ez. Harremanak aldatu dira akaso, hirugarren solairuko ezkonberriaren eta bere amorantearenak, haur eta gurasoen artekoak, fededun eta fedegabeenak. Pertsonen elkarren artekoak. Guztiak osatzen dute gure inguruko Mundua. Bakarra deritzoguna, gure zilborraren inguruan mugitzen den hori, hain zuzen ere.
Mundua aldatu da bai, denok goaz aldatuz eta horregatik ez gara konturatuko, apika. Edo beharbada beste mundu batean bizi naiz...

2006-07-13 22:47:03 (anabasa)

propaganda

Gauzak neurtzea ezinbestekoa dirudien garai hauetan, ezin dut burutik kendu blog hau bisitatzen duzuen ehuneko nahiko altu batek nabigatzaile bezala Internet Explorer erabiltzen duzuela.
Baina... web orriak bisitatzeko ez al da ba joan behar ordenagailua piztu eta internet jartzen duen ikonora? Bai, baina badira modu hobeak.
Nik ordea informatikaz ez dut piperrik ulertzen!! Nik ere ezer gutxi dakit automobilen inguruan, baina kotxe bat erosterako garaian logikoena marka eta modelo ezberdinak alderatzea litzateke ezta? Ba sarean nabigatzerako garaian berdin.

Muturraren aurrean jartzen diguten lehenengo gauza irensten dugu, aztertzen hasi gabe ezer hoberik dagoen inguruan. Edo behintzat zerbait ezberdina. Ongi etorriak aniztasunaren mundura. Badaude alternatibak ikono urdin horrentzat bada: Opera, Mozilla Firefox, Safari, Konqueror, ...

Portzierto, ba al dakizue gehiengoak erabiltzen duzuen programa horrek —konparazio soil bat egitearren— ez daramala airbagik, autopista erdian uzten zaitula errore grabe baten ondorioz eta beharbada kotxetik irten eta atea itxi ezinean ibiliko zarela?

Demagogiarik ez dut egingo, propaganda dei diezaiokezue agian baina nik uste iritzia ematea ez dagoela sobran beti ere eraikitzeko baldin bada. Pertsonalki uste dut aukera on bat Firefox erabiltzea dela. Zergatik baina? Horrela harrapaladan okurritzen zaizkidan arrazoien artean:

  • Software librea da
  • Beste hainbat nabigatzailek baino segurtasun zulo gutxiago ditu (ezer ez da perfektua)
  • Estandarrak betetzen ditu (zenbait matizekin puntu honetan)
  • Gehigarri mordo bat ditu nabigatzailea gure beharrizanetara moldatzeko
  • Itxura alda diezaiokegu gaien bitartez
  • Popup leiho nardagarri horiek blokeatzen ditu (pornozaleek eskertuko dute)
  • Oso erabilgarria da
  • Euskaraz eta beste hainbat hizkuntzatan aurki dezakegu
  • Etabar luze bat...

Orain, nik uste onena bakoitzak norbere begiekin ikustea dela nola dabilen nabigatzaile bakoitza eta ondoren erabakitzea. Ezin esan ez zaigula gustatzen probatu gabe. Kontatuko didazue nahi izanez gero...

2006-07-12 23:35:55 (anabasa)

kasualitate

Kasualitatezko hitzek inguratzen gaituzte boladaka, haize-erauntsiak bezala; hormigoi-axuleiu, hondar-manta, farolak testigu, baita eguzki izpiak ere.

Goiz bat, arratsalde bat edota gau bat paseoan, hitz-jarioan ala begirada galduan. Zerbait sentitu nahi nuke bakarrik ez nagoela ikusteko, guzti hau kasualitatearen ondorio soil bat izan dela ez antzezteko.

Hemendik aurrera, urtaro honetan kasualitatezko pentsamendu oro da berdin: zalantza-malantza, duda-muda. Ez dakigu nongoak garen ez eta nongoak izango garen, inbaditzen dugun ala inbaditzen gaituzten, bart gaueko garagardoak norenak ziren eta mozkor handiagoa nork harrapatu zuen, atmosferan gu bion artekoa baino hizkuntza nabarmenagorik dagoen. Gu bakarrik ote garen herri honetakoak.

Ihes egiteko modu soil bat bila dezagun, munduko erlojuak lokartzen diren pausagunea aprobetxa dezagun zalantzak uxatzeko. Denak alde egiten duten une hori bakarra da, fantastikoa, bertakoak garela sentiarazte gaituena eta bakarrik ez gaudela ikustarazten diguna. Horregatik hautatzen dugu momentu hori kasualitate guztiak hausteko, hondartzara joan eta bainu fresko horren pribilejioaz gozatzeko.

2006-07-05 20:28:01 (anabasa)

banatu

Nork pentsa dezake liburu bat salba daitekeenik? Mila eta bat hitzeko kateamenduaren emaitza bat aurkitu nuen bart euripean, bakardadeak jota eta zuhaitz-tantak xurgatuz, farolaren argiaren laguntza kontsolagaitzaz eta azala gorputzagandik banatuta.
Nork abandonatu, nork kondenatu?

2006-06-24 20:32:39 (anabasa)