155 objektu kaxa hutsean “anabasa” formakoak.

txoko

arnas pausatua
30 km/h-ko abiadura-muga duen kaletik pasieran
umeak dira soinean
hipster ama-berrien tatuaiak

hirurehun mila pezeta
zenbaki irrazional bat da
etxearen alokairua

ez da asko eskatzea
txoko txiki bat
zurezko lurra eta
kafe katilua eskutan nola
epelduko zaituen sukaldeko argia

2017-07-25 13:45:50 (anabasa, neurtitz)

demostratu

Lehena iritsi da tabernara. Ordua begiratu du; garaiz ailegatu da. Nor izango ote da? galdera erantzuteko ez da asko falta.

Hau al da? hurrengo pentsamendua. Benetan hau al da? errepikatzen du bere kolkorako. Agurra, lehen hitzak. Gezurra dirudi, pelikuletan-edo ager zitekeen makilatu gabeko neska lirain horrekin ari da berbetan.

Elkar ezagutzeari ekin diote. Isiluneren bat-edo tarteka; kaña-basoari muturretik heldu eta aparrari pixka bat eragiteko aprobetxatu dute. Ohikoa: nor diren, nondik datozen, nora doazen. Nondik ibili diren jada. Nondik ez diren ibili.

Azkureak eragin dio intelektoan. Ez da gai ordea nahiko lukeena hitzez artikulatzeko. Hizkuntzaren komeriak. Badaki ez dela aparteko zera; iraganeko azkurak min izatera irits zitezkeen.

Segundu er(d)i bat nahikoa da bere gogoan bortxa eragiteko. Aldamenean duela erakutsi nahi dio eta horretarako bere izaera saltzeko ere prest dago: autoa abandonatu, etxez aldatu, zipitzik axola ez zaizkion liburuak irakurri, Yogari ekin, postureoa praktikatu, berez ez den eta izan ezin duen hori dela demostratu.

Eta oh, Pretty girls make graves...

2017-01-25 00:51:43 (anabasa, bizhitz)

akuilu

Ez daukazun horren zama, behinola eguneroko dema zena, kostuma, bilakatu da berriz ere jomuga.

Desoreka bete zakuk beti irabazten du balantzan. Zakutik eskukada bat hartzen saiatu eta hatzen artetik harea nola, hala desagertzen da nahi idealek ohitura eta konformismoari botatako apustua.

Ez jakitea nola bukatu da aurrera jarraitzeko akuilu ia bakarra.

2016-12-31 14:09:42 (anabasa, bizhitz)

bukatu

bukatu gabeko testuak eta hasi gabe ahaztuta geratu diren asmoak

pedestrian xing:
itzaltzen ez diren argiek
esnatu naute

"a-ja", errepikatu dut etsipenez eta
hasperen egin dut
azkenean ezingo garela elkar ikusi idatzi didazunean

bukatu gabeko denboran bizi naiz
erdizka
pauso laurden bat aurrera, bi atzera

2015-12-31 17:07:54 (anabasa, neurtitz)

sara

Sararen etxeko paretek piano-doinu geldiezin hori arnastu zuten. Festaren zalapartaren erdian bakarrik geratu zen, egongelako sofan ardo koparekin bakarrizketan. Menturak bustitako beste gau bat izan zen hura, ordea txanponak betiko aldeari egina zion soa. Aspertuta zegoen bere txikitako traumen esklabu eta testigu izateaz. Bat-bateko erabakiz, jarrera berriei heltzeko garaia heldu zen: sukaldera jaiki, beste botila bat ardo bereganatu eta isil-gordean ezkutatu zen.

2015-09-20 00:28:45 (anabasa, bizhitz)

izenburu gabea

Nerabezaro aldera-edo idazle izatera jolastea erabaki zuen. Halaber jakina zeukan bere lehen liburuaren izenburua. Garbi samar ikusi zuen Garamond letra-tipoa erabiliz inprimatuko zirela letrak. Arrakastaren aparrak bultzata egingo zuela ihes anonimo izatera. Eta kaputxa jantzita egingo ziotela entrebista Sautrelan.

Urte puska batzuk geroago, ardo kopa eskuan hartuta aspaldiko zirriborro batzuei begira aritu da. Hortxe topatu du ispilua: bista-bistakoa, urrutira joan beharrik gabe noraezak itotakoa, koloreak denborak ezabatua, izenburu gabea.

2015-07-25 22:32:35 (anabasa)

funditu

laga-boga-sega zarata izan da gabaz, batere ganorazko lorik egin gabe, izerdiak kontsumitutako egunetik ihes, itzalak ere ez dira babesleku, jateko gogoak akabatuta, azaltzen ez den lagunaren zain, etxeko atea ere ez da irekitzen, postura hartuta zeundelakoan, lanparako bonbilla funditu da.

2015-07-02 23:45:52 (anabasa, bizhitz)

telebista

Garai batean esango zion bere buruari: hau izango da, bestea ekarriko du eta zerak jarraituko dio. Dena esanda dago, semaforo guztiak berde margotu dira. Eta amaiera berak idatzi zuenez, gustura.

Artean konturatu gabea zen helburuak besterik ez zirela, ikusi gabea zen bideak zidorrak ere bazituela.

Pentsa lezakeenaren kontrara, imajinazioari ez zion lanik eman uztaileko egun sargori hartan. Ohiko makinaria ez zebilelako agian, denborak bere (h)onera ekarri zuelako akaso.

Telebista guztiak itzalita geratu ziren egun hartan.

2015-07-02 00:25:34 (anabasa, bizhitz)

fox

french fox

"French Fox's specialty was sex" aipua luzatu didazu, nire breastak $3500en truke handitzeko eskaintza luzatzearekin bat. Ez dut erlazioa ulertu eta minduta sentitu naiz, puta modura ikusten nauzun edo ze demontre.

Nahi dudan bakarra nire diruaren jabe izan eta sentitzea da, nire gorputzarena naizen bezainbeste.

2014-11-10 20:35:17 (anabasa, bizhitz)

tödistrasse

Bere gelako leihoak
Tödistrasseko patio hartara ematen zuela
esan zidan.

Hozka egin nion okerreko interpretazioari eta
ahaztu egin zitzaidan
arropa zuriak zeramatzala soinean,
ahaztu egin zitzaidan
zuriz jantzita ikusi nituela aurretiko emakume guztiak.

Anja zeukan izena,
ez nintzen gogoratzeko gai izan lehenengo aldiz aipatu zidanean,
ez nion oso ondo ulertu nahi izan.

2014-08-20 17:21:23 (anabasa, bizhitz, neurtitz)