67 objektu kaxa hutsean “neurtitz” formakoak.

psikotropiko (II)

Entzuten den arnasa bakarra
ohe honek bere egin duen
bion arteko armonia horrena da

Taupadaka ari den hauspoa bizituz
gelako sua ere areagotu da

zarata bakarra gara
oihartzun simetrikoan isuria
eta poliki-poliki
behera datorren gauaren argiarekin batera
baretu zaigu antsia.

Orain bakarrik nago hemen
gorputz honek izan nahi zuena
eskuekin adierazi nahian

Ez dakit zein ordu-zonatan esnatu naizen
kalendarioari beti egun bat gutxiago
ematen diodan honetan.

Psikotropiko hau
demasa da.

2012-04-19 02:53:12 (neurtitz)

psikotropiko (I)

Garun isolatu bat nahi nuke
izozkailuan sartu eta
bizitzaren alderik hutsalenera naramaten neurona horiek
hotzak jota akabatzeko.

Minbiziaren kaiolan eman ditut hilabeteak.
Hasieran sendabidea zena
eguneroko pilula bilakatu zait.

Arnasak lurrundu dizkit kristalak
ito zaizkit norabideak
tatuatu zait ezinegona.

Zahartzaroaren atariko barometroak
presio baxuak iragarri ditu eta
aitzakiaren euritan blaitu zait denbora.

Arnasa ere ukatuz nire buruari
nola demontre eman niezaioke buelta egoerari.

Psikotropiko honek
bere egunak kontatuak dauzka.

2012-04-16 10:56:45 (neurtitz)

hollywood

Euria goitik-behetik Hollywood Rd. 17an
labouring hitza hiztegiratzeko garaian
zulo beltza daukat laneko zapatiletan eta
inpazientziaz blai nago
Hey buddy, how are you doing? galdetzen du nagusiak
erlojuaren segundoak astun egiten direnean.

Karretilak berunez egina dirudi
gidari baldarra sentitzen naiz
lur lohituan barrena eta
Sven Nys imitatu nahi nuke
orduko 20$ ematen duen
ziklokros karrera honetan.

Horrelakoa da bizitza:
poema bat tatuatuko dizut zementu gogorrean
Jackhammerra eskutan hartuta.

2011-11-22 13:37:33 (bizhitz, neurtitz)

postal

postal

Toki ezezagunak
postaletan agertzen ez direnak
gure baitan ditugunak baina oraindik
aurkitzeko daudenak.

2011-10-30 22:17:39 (bizhitz, erretratuetan, neurtitz)

eta

paseo bat larrazkeneko ahora:
ondoko herritik bueltan
amestutako eszenak akuarelaz margotuta

aspaldiko ezagunarekin ikusi zaitut oinez;
inoiz ez gara hirurok elkartu birra batzuk hartu eta
tertulian aritzeko

beranduago kale nagusian,
dirua ateratzen zeundela buelta eman eta
artean kendu gabeko kaputxatik irten zaizu mira.
irribarre bat izan da airean
datozen denboren ahoko zuloan

garaiko zeru oskarbiak ondo daki
hotza azalean itsasten hasiko zaigula
eroso deritzen portuak aurkitzeke daudela
eta bitartean
nork bere aterpeak bilatuko dituela

urteek ahaztu dituzte
besarkaden arteko espazio konpartituak

geratzen zaizkigun errebolberrak
pazientziaz kargatuko ditugu
presa ez dadin izan lehergai
behinola banatu gintuen bidegurutzean.

2011-10-22 14:46:24 (anabasa, bizhitz, neurtitz)

inguru

Bitan banatu zait ingurua
hondarra sentitzen dut zainetan eta
pisua hartzen ari den zamak
aingurak marrazten ditu zure betazaletan.

Datorrenari begiratu nahi nioke
maskara guztiak kenduta,
lotsaren azalak berriz erantzi,
balizkoak ahaztarazi.

Biren arteko gurutzean
ernaldu zait garuna:
hemen nabil errari
hausnarketa pusketak erditzen ikusi nahirik.

2011-09-13 00:10:37 (bizhitz, neurtitz)

erronka

Sukarrak jota dagoen kamareraren
irribarre lotsatia
kaña bat eguzkitan eta
datorzkigun erronken aparretan esnatzea.

Kraterrak ditut memorian
eta zelai berdeak
terreno urbanizableetan.

Ez galdetu inori
zertara natorren
karneteko izena nirea
ala momentuan asmatua den.

2011-08-07 01:17:26 (anabasa, bizhitz, neurtitz)

baitan

Begien aurrean urtzen zaidan liburua
ulertzen ez ditudan istorioak eta
neska bat hondartzan bakarrik nire aldamenean.

Eguzkiarekin batera
mendebalera egin duelarik
papera eta lapitza hartu eta
nire baitan arnastutakoak idaztea da
lehenengo hitzetik
koldarraren sinadura ipintzea.

2011-08-04 22:55:08 (bizhitz, neurtitz)

hondarra sabelean

Abortu naturala naiz
gaztaroaren itzalean,
min ematen duen denbora
eta hondarra sabelean.

2011-07-25 11:18:38 (bizhitz, neurtitz)

kaligrafia

Ez dut sinisten amaren alaba zarenik
autopistak
180km/h-ko abiaduran joateko diseinatu dituzun
bidezidor estuak dira

nola jabetu ingurukoaz
hitz egiten saiatzen naizen bakoitzean
once you go black, you never go back
irakurtzen badut
inongo eskuek orraztu gabeko hitzetan

bere horretan

kaligrafia ikastaro hau kenduta
guztia da debalde
oraindik baldar bainabil zirriborro honetan
nire izena eguneroko zeren artean kokatu nahirik.

2011-07-17 15:04:02 (anabasa, bizhitz, neurtitz)